كنت نايم على نفسي قدام التليفزيون لا بيّا و لا عليّ .. جاني شبح أبيض في أبيض مش باين منه غير رجلينه من تحت ديل الجلابية البيضا حسيت أنه أخدني معاه لكن كمان حسيت أني لسه قاعد قدام توفيق عكاشة وهوه بيزعق والجاكتة مشقوقة وباي تحتها أنه لابس 13 تي شيرت و كل تي شيرت فيه 13 خرم وطبعا إحنا لسه في 2013 .. و ده بقه معناه أن الشبح رح يوصلني لمعتقل الحرية برابعة العدوية. خطفوا مني على البوابات بطاقتي الشخصية(الذهنية).. مسحوا منها جميع الأرقام ما عدا الرقم 13 .. حطوني في صينية كعك ودخلوني الفرن وبعد شوية حسيت بنفسي خفيف. خفيف قوي. فاااااضي، ولقيت جنب مني واحد قاضي، وكل شوية يزيد عددنا.. ناس كتيييير قوي .. ناس أعرفهم وناس ما أعرفهمش بس كنت مبسوط قوي بالناس الجميلة إللي قابلتهم هناك قابلت مسلمين و مسيحيين و شباب و بنات وأطفال و عواجيز، و قابلت هناك كل أصحابي الغايبين والحاضرين، والعايشين و المستشهدين .. من الآخر.. أنا شفت مصر كلها هناك، شفت الحاضر والمستقبل وشفت التاريخ.. البلد كلها مخطوفة هناك في رابعة .. ما يغركش أنك بتشوف الناس ماشية في الشوارع المصرية.. الناس دي اللي أننت بتشوفها رايحة و جاية في الشوارع المصرية ـ دي بقه تبقى النسخة الذهنية من الجماهير المصرية لكن النسخة الأصلية هناك في الأرشيف السري تحت منصة رابعة العدوية على بُعد 13 قدم فوق سطح البحر .. مش هأقولكم شفت كمان مين هناك.. !! شفت (حكام ) .. أيوة حكام .. لكن مش زي الحكام اللي في بالك دولا (الطراطير) لا .. أنا شفت (حكام كورة).. يعني رياضيين. يعني عندهم روح رياضية، مش استبدادية !! شفت كتييير .. كتير قوي.. شفت "توكل كرمال" كانت رايحة تسأل عن (نوبل) كان برضه مخطوف هناك وسايبين لها بدلاً منه حتة ورقة زي شهادة كده (ذهنية) توهمها بأن نوبل لسه معاها، متعلق على الحيط .. ولا اتخطف ولا حاجة. شفت ناس كتير.. ملايين المصريين مخطوفين و بيهلّلوا زيّ المجانيين و بيغنوا ويردوا على نفسيهم: ثورة دي والاّ إنقلاب؟.. انقلاب إنقلاب ..!! ناس كتير كتير . و كلامي بقى كتير و مقالي طويل و أنا ما عنديش وقت .. رايح أتابع فرن الخطف .. كلها 13 يوم كده وأرجع أحكي لكم عن نوعيات تانية من الناس المخطوفين لكن قبل ما أمشي رح أقول لكم عن أغرب مخطوف شفته في رابعة العدوية.. تتصوروا شفت مين؟! ـ شفت جون أبو تريكا في الصفاقصي التونسي في نهائي كاس أفريقيا إللي خطفه في آخر دقيقة من المباراة. بس على مين يآآآبه ..!! ـ الولاد الأولتراس الأهلاوي (الجدعان الحلوين) قالوا لأبو تريكة كفاية عليك قوي كده خطفت الجون.. سيبنا بقه نطلع لنا بحاجة.. و هوووب، هوووب، خطفوا الكاس .. وفضلوا شايلينو و يهتفوا بيه وهمّه بيطوفوا ميدان رابعة ( آهلييييي..آهلييييي.. الله أكبر) ( آهلييييي..آهلييييي.. الله أكبر) ( آهلييييي..آهلييييي.. الله أكبر) و طبعا (أهلي) يعني (مصر) و طبعا (الله أكبر) معروفة يعني: أكبر من كل الكذابين على الشعب، والمنافقين للسلطة، والخاينين للعهود و المزورين للإرادة الحرة للمصريين، والحاقدين على المصريين الجدعان الطيبين، وبيشوهوا صورتهم، وصورة ثورتهم العبقرية اللي أبهرت كل قادة و حكام و شعوب العالم في 2011 . لكن هوّه مين .. !! ده أحنا برضه مصريين !! و هنفضل دايما واثقين من نفسينا وبلدنا و أهالينا ومش رح نبطل أبداً (ننخطف ذهنياً) و نغني .. و نهتف ونقول: ثورة دي والاّ انقلاب؟ـ إنقلاب إنقلاب.. و يسقط كل الكذابين ***