هنا التحرير.. ممنوع دخول ناس تانيين!! شعر: محمد عزت الشريف *** ثورة دي.. والاّ انقلاب والاّ رقصة .. واحتفال والاّ.. يوم دفع الحساب .. ممنوعين من الدخول أنت مافيش على راسك ريشة ولا على أكتافك دبابير.. ولا من بين أعضاء الفرقة ولا ينفعشي تكون رقّاصة !! اخرَسْ بقه و ارجعْ لمكانك.. أو أخرُمْ عينكْ برصاصة !! إيه بقه يعني تقوللي جريحْ والاّ تكونشي حتى شهيدْ والأرض بتتكلم عربي و عَمْ بتغنِّيلكم أناشيدْ !! و بسّ انتوا اللي بدعتوا الثورة و ماتت أمُّكوا في التحرير؟!! آه يا بَشَرْ مأفونْ و أناني من بحري و صْعِيد جِوّاني عايشين لسّه فـ كاني و ماني وْ معزولين وْ منبوذين..!! مِ الآخِر بقى يا حبيب قلبي كده أو كده.. مانتوش داخلين؟! رُوحوا شوفولكم ميدان تاني ما خلاص قَسِّمناها اتنين.. إحنا شعب .. وانتم شعب بسّ احنا الأوَّلانيين !! إحنا شعب .. وانتم شعب وْ تصنيفنا الأوَّلانيين !! *** القاهرة على مداخل ميدان التحرير في السادس من أكتوبر 2013